புறக்கணிப்பின் நெடுந்துயரம்

கடந்து கொண்டிருப்பதின்
நினைப்பற்று
கடந்து கொண்டே
காலம்
கால்மாற்றி கால்மாற்றி
பின்னும் வலைகளில்
இரையாகி விரிகிறது
நினைவுப்பெருவெளி

ஏதோ ஒரு இழையை
குருதி கொப்புளிக்க
அறுத்துச் சென்றது
கருவேலமுள்ளின்
கூர்நுனியொத்த
புறக்கணிப்பின்
நெடுந்துயரம்

இலக்கற்று வெறிக்கும்
தண்டவாளப் பார்வைகளில்
மரணித்த கனவுகளின்
இறுதிப்பயணம்.

மழையாய் மழைத்தல்

நேற்றிரவு
மழை
பெய்தது
முன்பும்
பலமுறை
நிற்காமல் பெய்த
நம்முதல் தீண்டல்
கறுத்த இரவைப்போல

மழை பெய்தபடியே
இங்கில்லாவிட்டால்
எங்காவது
வெயிலைப் போலவே
மழையும் அனுதினம்

மொழியின்
அடைமொழியில்
மூச்சுத்திணறாமல்
மழையாக மட்டுமே
பெய்தது அடைமழை

மழையாய் மழைத்தல்
மழையால் மட்டுமே
ஆகக்கூடியது

புரியத்தருகிறாய்

புரிந்துகொள்ளும் படியான
வார்த்தைகளில் நிகழ்வதில்லை
இயல்பான தருணங்கள்

புரிந்துகொள்ளும் வார்த்தைகளில்
விவரிக்கும் பொருட்டே நிகழ்கிறது
வீசியெறியப்படும் அனைத்து
கவிதைகளின் முதல்வரியும்

புரிந்துகொண்டதை
புரிந்துகொண்டதாகவே
புரிந்துகொள்ளும் என்புரிதல்களில்
புரியாத ஒருதருணமாகவே
புரியத்தருகிறாய் நீ.

இசையாய் புணர்ந்தவெளி

இளையராஜாவின் பாடல்களில்
மட்டுமே காதல் இன்னமும்
வாழ்வதாக நாம் கொண்டிருந்த
நம்பிக்கை இன்றளவும்
தன்னை புதுப்பித்து
வழிகிறது ஏமாற்றம்
புனைந்த விழியோரம்


நினைவுகளின் அடுக்கில்
நுழைந்து நம்மை குதறும்
சூழலின் வண்ணம்
வெறுமை நிறைந்த
இருளின் நிறமாகவே
இருப்பது தற்செயல்
ஒற்றுமையல்ல
தீண்டல் விளையாட்டின்
வெறித்த விட்டங்கள்
பிரிவின் வலிஅறிந்தவை
வண்ணங்கள் அற்றவை

கால்கள் புணரும்
பலகையின் ஓலம்
அறையை நிறைக்கும்
சீரற்ற நகர்வில்
தொக்கிநிற்கும் வெறுப்பின்
வலியுணர்ந்து தரையலறும்
இருளை குடிக்கும்
ஒலியின் ராகம்
ஒப்பாரி என்பது
உன்னைப்போலவே
எங்கோ வெறிக்கும்
இருள்மூலைகள் மட்டுமே
அறிந்த ரகசியம்

வெளியில் மிதக்கும்
இசையின் துண்டொன்று
எந்நொடியிலும் துளைக்குமென்ற
எதிர்பார்ப்புடனே அனுதின
புணர்வின் களம்
வறண்ட கண்ணீரை
மொழிபெயர்த்தறியும் குழலின்
துளைகளில் நிகழும்
வன்புணர்வில் குறிகளின்
குறிப்புகள் அல்லது
இசையாய்ப் புணர்ந்தவெளி

நீநானிருளொளி

பின்னோக்கிச் சென்று
உன்னில் இருத்தல்
என்றாகிவிட்ட வாழ்வில்
நாம் மழைக்கு
ஒதுங்கிய மரங்களை
கண்டடைவது சிரமமாக
இருக்கவில்லை
எப்பொழுதும் நிற்கும்
அதே மரங்களின் மீது
பெய்த மழையை
எதிர்கொள்கிறேன்
எதிர்பாரா அவசர
நாட்களில் முன்போல
புதிராய் தெரிவதில்லை
என்றாவது கலையும்
முன்முடி கோதும்
விரல்களை எனதாக
நினைக்க மறுத்து
தீண்டல் கனவுகளில்
அலைபாய்கிறது
என் பதின்மத்தின்
சொச்சங்கள்
கலைத்த காற்றை
கண்டடைவதும்
எதிர்பாராமல் நடந்து
தொலைக்கிறது
அவ்வப்போது சிலமுறை

முன்பனி காலத்து
பின்மாலைப்பொழுதில்
நாசிநுனியில் பூசிய
குளிரை வெடுக்கென்று
பறித்த இளஞ்சூட்டின்
ஆதியும் அந்தமும்
அறியும் நிமித்தம்
இருளின் மென்மை
எழுதிய வரிகளில்
இடறியமேடுகள்
சமைத்த காலத்தின்
எல்லை எக்காலமும்
நான் கடந்திடமுடியா
பின்முன்மேல்கீழ்
நீநானிருளொளி
கரையும்சுகம்
கலையும்சுயம்
மயிர்கால்கள்
உயிர்பெற்று
வழியும்லயம்

நமக்கான ஒருமழை

என்னைப் போலவே நீயும்
உன்னைப் போலவே நானும்
முடிவில்லா கேள்விக்கு
முட்டாள்தனமான
விடைகளில்
பெருமூச்செரித்தெரிய
உன் கோவத்தில் என் காதலும்
என் கோவத்தில் உன் காதலும்
அலைகழிகிறது மாலைக்காற்றில்
இலவுவெடித்த வெற்றுப்பஞ்சு

காதலை சுமந்து திரிந்த
பருவ நத்தைகள் நாம்
உன் உலகம் உனக்கானது
என் உலகம் எனக்கானது


கருமழை முன்னிரவில்
நாம் ஒடுங்கிய குடை
அறிந்திருந்தது
நமக்குள் வறண்டிருந்த
பொட்டல்வெளியை

சவரம்செய்து
கட்டிப்பிரிந்து
நாள்முழுதும்
திரைவெறித்து
பிணமாய் நகரும்
வாழ்க்கை உனக்கும்
வாய்த்திருக்கும்

ஊடாடும் கனவுகளில்
உச்சமடையும் உன்
இயலாமை என்னையும்
பிய்த்தெறிந்து
ஓலமிடாது அனுதின
இரவுகளில்
குடைதுறந்து
நமக்கான ஒருமழையை
நீ பெய்வித்திருந்தால்

வானவில் தீண்டல்

உன்னை பார்த்து ஒருநிமிடம்
தான் ஆயிற்று அதற்குள்
கணிணித் திரையில்
கவிதை வரிகள்

இதயம் இருப்பதை
நிறுத்தி நிறுத்தி
உணர்த்துபவள் நீ
கண்கள் இருப்பதை
வெறித்து வெறித்து
ரசிப்பவன் நான்

இதுவரை எழுதிய
கவிதைகளில் உனக்கான
ஒன்றை தேடிவைத்தேன்
உன்பெயரை கண்டநொடியில்
கூட்டுத்தற்கொலை
குறிப்பெழுதிவைத்தது
கவிதைகள்

நீ ஒரு sweet romance
Post Modernism புக மறுக்கிறது
வரிகள்

அருவித்துரும்பு நான்
வீழ்ச்சியின் ஈரத்தில்
உன் வானவில்
தீண்டல்

முயத்தலின் மழைக்காடு

பேனா முனையில் துயிலும்
கவிதையென சிறகுகளின்
மென்நுனியில் கண்விழித்தது
இன்றைக்கான பறத்தல் தூரம்

தொலைவின் அளவை
வேர்நுனி அளக்குமா
இலைதழுவும் காற்று
அளக்குமா பயணத்தின்
கனவுகளில் வானம் மட்டுமே
தொடக்கிடைக்கும் தூரத்தில்

உன்முத்தத்திற்கு பின்பும்
பெய்துகொண்டிருந்தது மழை
நீதான் முத்தமழையா
நீ அணைப்பதற்கு முன்பே
எரிந்துகொண்டிருந்தது
மயிர்க்கால்களின் வழியே
தொன்மத்தின் முயத்தல்
கங்குகள்

முயத்தல் மழை இன்னமும்
சொட்டிக்கொண்டிருக்கும்
இலைநுனி கலைக்கும்
நினைவின் அடுக்குகளில்
வெளிறிய அல்குலின்
மெல்லிய துடிப்புகள்

இடைவெளி தொலைந்த
இடைகளின் வெளியில்
உயிர்பெற்று விரிந்தது
ஒளியும் நுழைந்தறியா
மழைக்காடு